Vietnam, Singapore, Canada, US, Paris, at Italy ay ilan lamang sa mga bansang napuntahan na ng Filipina na si Mirna kasama ang ilan niyang pamilya at mga kaibigan. Ang yaman nito ay naiulat na mula sa kanyang asawang Australiano at sa ilang dekada nitong pagtatrabaho. Si Mirna ay mula sa Quezon City bago ito permanenteng nanirahan sa Valley View na matatagpuan sa Adelaide.

Doon ay tahimik silang namuhay kasama ang anak nilang si Mark. Tulad ng ibang mga Filipino, si Mirna ay parte ng Filipino community. At kahit sinong tanungin mo, ang ginang ay inilarawan na tahimik. Pero ito ay palakaibigan, galante, at family-oriented. Ang mga Nelson ay naging madalas ang pagbiyahe sa Pilipinas, pero ang kasiyahang nitong nararamdaman ay napawi nang mamatay ang kanyang mister.

Ang mag-ina ay namuhay nang tahimik sa kanilang bahay. Si Mark ay lumaking maayos. Isang araw ay ginulat nito si Mirna nang ipakilala niya ang kanyang fiance na si Caroline. Ang dalawa ay kalaunang nagpakasal at nagkaroon sila ng tatlong mga anak na talaga namang ikinasiya ni Mirna. Ang kapitbahay ng mga Nelson ay nagpatotoo na ang mag-iina ay palabati sa tuwing nakikita nila ang mga ito.

Sa social media ng ginang ay makikita mo na isang proud na lola si Mirna. Naiulat din na ipinarenovate ni Mirna ang kanyang bahay na noo’y nagkakahalaga ng 350,000 Australian dollar. Nilagyan din niya ng mataas na fence ang kanyang bahay para naman sa kaligtasan ng kanyang mga apo. Noong 2016 ay tila ang pinaka-espesyal nitong taon.

Siya ay bumiyahe sa ibang bansa kasama ang kanyang manugang at mga apo. Nakauwi rin ito ng Pilipinas na kasama ang ilan niyang mga kamag-anak, sa Singapore ay dumalo sa kasal ng isa niyang kaibigan, at naipagdiwang niya ang ika-71 taon ng kanyang kaarawan. Ngunit iyan na pala ang huling beses na magdidiriwang si Mirna ng kanyang birthday.

Sapagkat bago magtapos ang buwan ng Setyembre ay puputok ang balita na ito ay patay na. Ang mga taong nakakakilala rito ay nagulat dahil wala naman itong sakit. Ngunit mas nagulantang sila nang mabalitaan na ito ay pinatay mismo sa sarili niyang bahay. Sa footage na iyan ay makikita mo ang mga awtoridad na sinelyuhan agad ang labas ng bahay ni Mirna, na isang indikasyon na hindi talaga ito namatay dahil sa natural cause.

Habang naghihintay ng impormasyon mula sa mga awtoridad, ang mga kapitbahay, kaibigan, at ilang kaanak nito ay nagbigay ng mensahe ng pakikiramay. Nag-iwan din sila ng bulaklak at card sa labas ng bahay nito. Ang Filipino community ay hindi rin nagpahuli at ang lahat ng mga ito ay nakiramay kay Mark. Nang makuha nito ang go-signal para maiuwi ang bangkay, ang burol ay ginanap sa St. Francis Xavier Cathedral.

Kahit nasa kalagitnaan ng lamay, ang ilang reporters ay in-interview pa rin si Mark tungkol sa nangyari at kung mayroon ba itong clue kung sino ang gumawa niyon sa kanyang ina. Ngunit naging matipid ito sa pagbibigay ng anumang impormasyon. Sa video na ito ay saksi ang lahat ng mga tao na talagang naging emosyonal itong si Caroline habang sinasabuyan nito ng holy water ang kabaong ni Mirna.

Pagkatapos itong maihatid sa huling himlayan ay hindi pa rin tumitigil ang mga tao sa katatanong kung sino ang kayang pumatay dito. Pero wala naman silang pagpipilian kundi maghintay sa update ng mga awtoridad. Ngunit ang update mula sa mga ito ay hindi agad nangyari. Natapos ang taong 2016 nang walang pag-usad sa kaso.

Noong taong 2017 ay unti-unti nang nawawalan ng pag-asa ang mga kapamilya nito na may mangyayari sa kaso. Pero noong March 1, 2018, ang lahat ay nagulat dahil hindi lamang kumalat ang balita na mayroon nang naaresto, kundi inanunsyo ng mga awtoridad na ang manugang na si Caroline ang hinihinalang salarin na pumatay sa biktima.

Ang mga awtoridad ay sinampahan ito ng kasong murder. Sa bigat ng ebidensya laban dito, ang judge ay hindi pumayag na ito ay makapagpiyansa kaya nanatili ito sa kulungan habang naghihintay ng trial. Ang ilan ay hindi makapaniwala na magagawa iyon ni Caroline sa biyanan nito. Ang mga Filipino na nakabasa sa news articles at nakapanood ng balita ay mabilis na sinabi na wala itong utang na loob.

Pero kahit ano pa man ang ibato nila sa 28 taong gulang na si Caroline, ang asawa nitong si Mark na anak din ng biktima ay nanindigan na nagkakamali lamang ang mga awtoridad at walang kinalaman ang kanyang misis sa nangyari. Habang si Caroline ay nakapiit sa kulungan at naghihintay ng trial, si Mark naman ay tinangkang maging normal ang buhay ng tatlo nilang mga anak.

Kahit patay na ang kanilang lola at nakakulong naman ang kanilang ina, kahit ito ay nagtatrabaho ay lagi itong updated sa mga nangyayari sa kaso ng kanyang asawa. Sa totoo nga ay nang magtangka ang kampo ni Caroline na magpiyansa ay sinigurado nitong nandoon siya para magbigay ng suporta. Lagi rin itong nakikipagkita sa mga abogado ng kanyang misis para magbigay ng mga bagay na maaaring maging ebidensya upang mapatunayan na ito ay inosente.

Sa kabuuan ay 100 porsyento itong sigurado na wala talagang kinalaman si Caroline sa nangyari sa kanyang ina. Habang ito ay nakakulong ay unti-unti na ring nalaman ng mga tao ang nangyari sa biktima. Ayon sa paunang imbestigasyon at naunang impormasyon na ibinahagi ng mga awtoridad sa media ay bandang 8:40 ng gabi noong September 30 ay rumesponde sila sa bahay ng mga Nelson.

Pagkatapos makatanggap ng tawag mula sa kapitbahay ng mga ito, mabilis silang rumesponde at dalawang kapitbahay ng mga ito ang sumalubong sa kanila at itinuro sa kanila ang driveway kung nasaan si Caroline. Sa report mula sa Emergency Services team ay inilarawan ng mga ito na ang ginang ay hysterical, umiiyak, at emosyonal.

Ang mga paa at kamay nito ay nakatali at nilagyan din ng tape ang bibig nito. Habang ang ilang mga sugat nito ay ginagamot sa loob ng ambulansya, ang mga awtoridad naman ay pumasok sa bahay at sa laundry area ay nakita nila ang wala nang buhay na si Mirna. Ang forensic pathologist ay kinumpirma na ang biktima ay namatay sa multiple sharp force injuries.

Nakitaan din ang matanda ng mga defense wounds na magpapatunay lamang na ito ay nanlaban. Pero ang isa pa ay pinalo din ito sa ulo. Sa tindi ng pwersa, ang eksperto ay sinabi na nabiyak ang bungo ni Mirna. Noong pinroseso ng mga imbestigador ang crime scene, ilang mga tao ang nagsabi na kaya lamang nila nalaman na may hindi magandang nangyari ay dahil hindi tumigil sa pagtahol ang kanilang mga aso sapagkat narinig ng mga ito ang malakas na sigaw at iyak ni Caroline.

Nang kalmado at nagamot na si Caroline ay in-interview agad ng mga detective. Sinabi nito na bago ang krimen, ang kanyang biyanan ay abala sa gawaing bahay. Kaya nagulat na lamang sila nang dalawang lalaki ang pilit na pumasok sa kanilang tahanan. Maiyak-iyak nitong sinabi na tinalian at binusalan siya ng mga salarin.

Inilarawan nito na ang mga suspect ay may taas na 5’6″, well-built, ang buhok nito ay kulot. Isa sa mga ito ay nakasuot ng white t-shirt. Ang pangalawa naman ay nakasuot ng itim na damit at mayroong hoodie. Gamit ang impormasyon na iyan, ang unang inisip ng mga awtoridad ay nilooban sina Mirna. Ang mga pulis ay ginalugad ang lugar na malapit sa bahay ng mga Nelson sa pagbabakasakali na maabutan pa nila ang dalawang lalaki.

Ngunit wala namang naging positibong resulta ang kanilang follow-up investigation. Kaya humingi sila ng tulong sa publiko sa pagbabakasakali na may nakakita sa sinasabing pickup truck. Nakiusap rin sila sa mga taong may security cameras at dashcam na lumapit sa kanila kung sakaling nahagip ng mga ito ang suspect.

Sa loob ng ilang linggo ay nagpabalik-balik ang mga awtoridad sa bahay ng biktima at siniyasat ang bawat sulok ng bahay nito. Ngunit tila sa tuwing babalikan nila ang crime scene, sa halip na maresolba ay tila mas dumami pa ang mga katanungan na bumabalot sa kaso. Una ay napansin nila na walang forced entry kaya tuloy hindi nila mapigilan na matanong na kung nilooban nga ang biktima ay bakit wala man lang senyales na pinuwersahang pumasok sa bahay ang mga lalaki.

Ang pintuan at mga bintana ay talaga namang intact at ni katiting ay walang basag ang mga ito. Kung pagnanakaw talaga ang motibo ng mga salarin, nakakapagtaka rin na ang gamit sa loob ng bahay ay hindi man lamang nagalaw o nagulo. Napansin rin ng mga awtoridad na noong makita nila si Caroline, kahit ito ay hysterical at emosyonal, ay napansin nila na ang tali nito sa paa at kamay ay maluwag.

Mas lalo pang lumago ang kanilang duda sa Pinay nang masuri nila ang Apple Watch ng biktima. Ang pagkakasunod-sunod ng mga pangyayari na sinabi nito sa mga awtoridad ay hindi tumutugma sa detalye na nakita sa relo ni Mirna. Kaya 17 buwan pagkatapos mamatay ng kanyang biyanan ay inaresto si Caroline ng mga awtoridad.

Para sa mga pulis, ang istorya nitong may nanloob sa bahay nila ay kathang-isip lamang ni Caroline dahil ito talaga ang pumatay sa kanyang biyanan. Sabi niya: “I won’t lie to it. I do want retribution but in the sense I want these guys to rot in jail.” Noong August 2020, halos apat na taon pagkatapos mamatay ni Mirna, ang manugang nito ay humarap sa korte para harapin ang kasong murder.

Ang prosecutor na gustong ipakulong si Caroline nang habang buhay ay sinabi sa mga hurado na ang istorya na may nanloob ay peke. Ibinahagi nito na ang tila perpektong buhay na ipinapakita ng mga ito sa social media ay hindi totoo. Lumalabas pala na noong magbuntis si Caroline, si Mirna na mag-isa na sa buhay ay kusang binuksan ang kanyang tahanan para sa mag-asawa.

Ngunit ang living arrangement na iyan ay naging sanhi ng ilang mga problema. Si Caroline ay madalas mainis sapagkat naging madalas ang pakikialam ni Mirna patungkol sa kung papaano niya palakihin ang kanyang mga anak. Bagama’t maganda ang intensyon ni Mirna sa pagbibigay nito ng payo ay minasama ito ng kanyang manugang dahil una ay siya ang nanay ng mga bata at ang pangalawa ay kahit gusto nito ng payo ay minsan ay hindi umano sumosobra na ang pakikialam nito.

Si Mark na gustong mapanatili ang katahimikan sa bahay ay naipit naman sa gitna. Kahit gusto nitong ipagtanggol ang kanyang asawa ay iniiwasan na rin niyang hindi magalit ang kanyang ina dahil may posibilidad na sila ay palayasin nito sa kanyang bahay. Pero ang hindi niya pagpili at hindi paglalagay ng boundaries sa pagitan ng kanyang ina at asawa ay naging rason para mas lalong lumago ang tensyon sa loob ng bahay.

Tila hindi pa niya naiisip na sa isang bahay ay hindi pwedeng magkaroon ng dalawang reyna na pwede niyang pagsilbihan. Sinabi ng prosecutor na sa pagdami ng anak nito na umabot na sa tatlo ay mas lalong sumama ang loob ng kanyang asawa kay Mirna. Bukod sa sama ng loob ay napatunayan rin sa korte na ang mag-asawa ay nagbabayad pala ng 2,000 Australian dollar na renta kay Mirna sa isang buwan.

Para sa mga taong magtataas ng kilay at hindi sanay na makarinig na nagbabayad ng renta ang anak sa kanilang magulang, ay normal na lamang iyan sa mga Western countries tulad ng Australia. Ang kanilang dahilan ay hindi nila responsibilidad ang kanilang mga anak lalo na kung may kakayahan naman ang mga itong magtrabaho at hindi na menor de edad.

Ang mag-asawa ay walang naging isyu sa living arrangement na iyan dahil kung tutuusin, sa laki ng kanilang pamilya at si Mark lamang ang nagtatrabaho ay mas makakamura sila. Pabor din ang setup na iyan kay Caroline dahil mayroon din siyang makakatulong sa pag-aalaga sa mga bata nang hindi nagbabayad. Ngunit ang pagkakaroon ng tatlong anak ang rason kung bakit nagkabaon-baon sa utang sina Mark.